Мѣсяца Іюля въ 15 день. Успеніе великаго князя Владимира Кіевскаго, крестившаго землю Русíйскую, во св. крещеніи Василія (†1015).

Сей великій царь Владимиръ, бяше сынъ С[вя]тославль, отъ племене варяж'скаго. Первѣе же къ идоломъ много тщаніе творя по отчю преданію. Да егда восхотѣ Богъ избрати себѣ люди нóвы, в'дохну в' сего благодать Святаго Духа, возбну ıaко отъ сна лютаго идолослуженія, и посла по всѣмъ ıaзыкомъ, испытая законы ихъ, кáко вѣруютъ. И увѣдавъ святую вѣру греческую, ıaко свѣщу на свѣтилѣ, и рече в' себѣ: сице да сотворю, пойду в' землю ихъ, и пленю грады ихъ, и обрящу ту учителя. И еже умысли, то и сотвори – шедъ, взя Корсунь градъ, и посла к' царема греческима, глаголя: дайта за мя сестру свою; аще ли не дадита, то сотворю граду ваю, ıaкоже и сему сотворихъ. Она же отвѣщаста: нѣсть здѣ таковаго обычая, еже христіаномъ даяти за поганыя; аще ли крестѝшася, тогда и то получѝши, и вящьше сего Царство Небесное. И рече Владимиръ: тако сотворю, пришедшіи же отъ тебе съ царицею, тіи да мя крестятъ. И в' то время в'паде Владимиръ в' недугъ очима, и рече царица пославши к' нему: аще не крестѝшася не избудеши болѣзни сея. Онъ же рече: крестѝте мя, ибо на то истое вы призвахъ. Егда же крестися, бысть чюдо веліе: в'шедшу бо ему во святую купѣль, отпадоша ıaкоже чешуя отъ очію, и отверзостася ему очи, и бысть, ıaко николи же имѣвъ болѣзни. И прозрѣвъ, похвали всѣхъ Бога, и просвѣщенъ бысть душею и тѣломъ, радовашеся. И пришедъ къ Кіеву, изби вся идолы, Перуна и Хорса, Дажб[ог]а и Мокша, и прочія кумиры. Посемъ позва все множество людей, и заповѣда имъ крестѝтися, и нарекъ имъ день, сице глаголя: аще кто не обрящется утро на рѣцѣ, той будетъ противенъ мнѣ. Тогда снидеся весь возрастъ мужей и женъ, на Почайну рѣку, и съ сущими младенцы. И совершеніи убо в' водѣ стояху, овіи до пояса, ови до выи, друзіи же бродяху, а презвитери пó брегу стояху, молитву творяще надъ крестимыми. И отътолѣ наречеся мѣсто то свято, идѣже нынѣ церковь есть святую мученику Бориса и Глѣба. Той убо бысть первыи ходатай нашему спасенію, святыи Владимиръ, иже и возрѣвъ нá небо помолися за христіаны глаголя: Боже, сотворивыи небо и землю, прѝзри на новопросвѣщенныя люди сія, даждь имъ Господи увѣдѣти Тебе, Бога истиннаго, и утверди ихъ въ правую вѣру. И мнѣ помози Владыко на сопротивныя враги, и надѣяся на Твою державу, поперу козни его. Повелѣ же людемъ ставити церкви по всѣмъ градомъ, а самъ созда церковь Святыя Богородицы удѝвовъ. Пребысть же нѣколико лѣтъ, нача болѣти, и преставися кó Господу, мѣсяца Июлія въ 15 день. Тѣло же его положиша, все множество, всея Русíйскія земли, боляръ же и людей, плачющеся ıaко отца и заступника своего, въ церкви Святыя Богородицы, юже самъ созда. Богу нашему слава, нынѣ и присно и вó вѣки вѣкомъ. 

​Источникъ: Прóлогъ [Мѣсяцъ Мартъ–Августъ]. — Москва: Печатный дворъ, 7152 (06.12.1643). — Л. 658 об. - 660
Эл. источ. http://nasledie.russportal.ru/index.php?id=pateric.vladim3


             Святые равноапостольные княже Владимире и
                княгине Ольго молите Христа Бога о нас!

Тропарь глас 1:
Яко начальнику крещения и кореню веры Божественныя, идолов разрушителю, блаженне княже Василие равноапостольне, вопием ти: слава Вразумльшему тя Христу Богу, слава Освятившему тя крещением Своим, слава Просветившему тобою всю страну Русскую.